Friday, July 1, 2016

पावसाळ्यातील पसंती : चिंचोटी, तुंगारेश्वर , पलुचा धबधबा, पेल्हार धरण

चिंचोटी धबधबा, Chinchoti Waterfall


तुंगारेश्वर धबधबा

तुंगारेश्वर अभयारण्याच्या घनदाट वनराईत आकंठ बुडालेल्या या शिवधामाला श्रावणमासी भाविकांची ही गर्दी लोटते. त्यात मंदिराशेजारून वाहणाऱ्या प्रवाहात ठीकठिकाणी निर्माण होणाऱ्या छोटय़ा-मोठय़ा धबधब्यांची रेलचेल भिजऱ्या मनांना इथपर्यंत आणते. वसई रोड स्थानकापासून ७ किलोमीटर अंतरावरील तुंगारेश्वर फाटय़ापर्यंत शेअर रिक्षांची ये-जा सतत सुरू असते. पुढे चार किलोमीटर पायपीट करायची नसल्यास खासगी रिक्षा थेट गेटपर्यंत नेऊन सोडते. तेथून कच्च्या मातीच्या सडकेवरून जाताना दोन-तीन वेळा ओढा ओलांडताना पाय ओले करत तासाभरात आपण देवळापाशी पोहोचतो. आवारात पूजेच्या सामानाची दुकाने तसेच चहा-नाश्त्याच्या टपऱ्या दिसतात. या भागाचे विशिष्टय़ म्हणजे येथील जैवविविधता. जंगलाशी  खऱ्या अर्थी एकरूप व्हायचे असेल तर येथे एखाद्या जाणकारासोबत जंगलात एक फेरफटका मारावाच. अनेक प्रजातींची फुलपाखरांनी जंगल समृद्ध आहे. ट्रेकिंगची हौस भागवायची असेल तर तुंगारेश्वर ते माथ्यावरील परशुराम कुंड असा छोटा सोपा ट्रेक करता येऊ शकतो.
या ठिकाणी पोहोचताना हिरव्यागार झाडाझुडपांच्या दाटीतून जावे लागते. या मार्गावर विलोभनीय धबधबे पाहावयास मिळतात. मुख्य धबधब्यापर्यंत पोहोचताना सुमारे तासभर चालावे लागते, तसेच वाटेवर वेगवेगळ्या प्रजातीची झाडे पाहावयास मिळतात.

चिंचोटी धबधबा


पश्चिम रेल्वे मार्गावरील वसई रोड स्थानकापासून अवघ्या ११ किलोमीटर अंतरावर असलेल्या चिंचोटी गावानजीकचा चिंचोटी धबधबा हे पावसाळी भटकंतीचे मुंबईकरांचे पहिल्या पसंतीचे ठिकाण. बस आणि रिक्षाच्या सहज उपलब्धतेमुळे चिंचोटीला पोहोचणे सुकर झाले आहे. गावातूनच ओढय़ाच्या कडेकडेने जाणारी ठळक पायवाट तास-दीड तासात आपल्याला धबधब्याशी घेऊन जाते. वाटेतील जंगलातील हिरवाई पाहून मन उल्हासित झाल्याशिवाय राहात नाही. धबधब्याच्या पोटाशी असलेल्या डोहात पोहण्याची मजा काही औरच. पण जुलअखेपर्यंत येथील कातळावर शेवाळ साचल्याने  सगळा परिसर निसरडा होतो. त्यामुळे येथे वावरताना योग्य खबरदारी घेणे आवश्यक आहे. तसेच अधिक पाऊस झाल्यास पाण्याचा जोर वाढून प्रवाह धोकादायक होतो. अशा वेळी डोहात उतरण्याचा मोह टाळलेलाच बरा. धबधब्याच्या वरून जाणारी एक पायवाट जंगल तुडवीत तुंगारेश्वरकडे घेऊन जाते. ट्रेकिंगचा अनुभव असलेल्यांनी हा छोटासा ट्रेक आजमवायला काहीच हरकत नाही.




पेल्हार धरण

पावसाळ्यात अतिपरिचित ओढे, धबधब्यांच्या ठिकाणांवर लोटणारी तुडुंब गर्दी चुकवून आडवाटेने भटकायची इच्छा असल्यास वसई रोड स्थानकापासून १० किलोमीटर अंतरावरील पेल्हार धरण परिसर हे योग्य ठिकाण आहे. डोंगर, हिरवळ, झरे असं नयनरम्य समीकरण जुळवून आणणारं हे एक शांत ठिकाण आहे. वसईला पाणीपुरवठा करणाऱ्या या धरणाच्या पाठीमागील तुंगारेश्वर डोंगरातून खळाळत वाहणारे अनेक ओहोळ या धरणात येत असतात. धरणाची कमाल पातळी ओसंडून वाहणारे पाणी पाहायला बरीच गर्दी जमते.



पलुचा धबधबा
पलुचा धबधबा


पलुचा धबधबा



हा जव्हार-विक्रमगड महामार्गापासून जांभागाव हददीतील डोंगरी भागात वसलेला आहे़ जून ते आॅक्टोंबर या काळात येथे मोठया प्रमाणात पर्यटक येतात. दगड व चिखलवाट तुडवतच येथे जावे लागते़ या धबधब्यांवर पर्यटकांची गर्दी असते़ मुंबई परिसर व अन्य ठिकाणाहून पर्यटक येथील निसर्गाचे अद्भूत रुप पाहावयास येतात़ या धबधब्यांच्या डोंगर माथ्यावरुन हिरव्या वनराईतून डोकावणारे छोटे छोटे धबधब रोमांचित करीत आहेत़

Labels: , , , , , , ,

0 Comments:

Post a Comment

Subscribe to Post Comments [Atom]

<< Home